សម្ដេចតេជោ ហ៊ុន សែន នឹងធ្វើជាអធិបតីក្នុងពិធីចុះហត្ថលេខា លើលិខិតប្ដូរសារ ការផ្ដល់ហិរញ្ញប្បទានឥតសំណង

: inewskh   : March 29, 2017 2:38 pm


ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជា នឹងអញ្ជើញធ្វើជាអធិបតីក្នុងពិធីចុះហត្ថលេខាលើលិខិតប្ដូរសារ ការផ្ដល់ហិរញ្ញប្បទានឥតសំណង នូវគំរោងចំនួន៤។
តាមសេចក្តីជូនព័ត៌មានរបស់ក្រសួងការបរទេសបានឲ្យដឹងថា នៅថ្ងៃទី៣០ ខែមីនា ឆ្នាំ២០១៧ វេលាម៉ោង៤ នាទីរសៀល នៅទីស្ដីការក្រសួងការបរទេស និងសហប្រតិបត្តិការអន្តរជាតិ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជា នឹងអញ្ជើញធ្វើជាអធិបតីក្នុងពិធីចុះហត្ថលេខារវាងលោក ប្រាក់ សុខុនទេសរដ្ឋមន្រ្ដី រដ្ឋមន្រ្ដីការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា និងលោក ហូរីណូអ៊ុជិ ហ៊ីដេហ៊ីសា (HORINOUCHI Hidehisa) ឯកអគ្គរាជទូតវិសាមញ្ញ និងពេញសមត្ថភាពនៃប្រទេសជប៉ុនប្រចាំកម្ពុជា លើលិខិតប្ដូរសារ និងកំណត់ហេតុនៃការពិភាក្សាស្ដីពីការផ្ដល់ហិរញ្ញប្បទានឥតសំណង និងឥណទានសម្បទានសម្រាប់គម្រោងចំនួន៤។
គំរោងនោះ ទី១- ហិរញ្ញប្រទានឥតសំណង ដែលមានទឹកប្រាក់សរុបចំនួន១០៩ លានយ៉េន (ប្រមាណ៩៤៩.៩៧៣ ដុល្លារអាមេរិក) សម្រាប់អនុវត្តគំរោង “ធ្វើឱ្យប្រសើរឡើងនូវការការពារ ទឹកជំនន់ក្នុងរាជធានីភ្នំពេញ តំណាក់កាលទី៤” ទី២- ហិរញ្ញប្រទានឥតសំណង ដែលមានទឹកប្រាក់សរុបចំនួន១.៤៥៣ លានយ៉េន (ប្រមាណ១២,៦៦ លានដុល្លារអាមេរិក) សម្រាប់អនុវត្តគំរោង “ធ្វើឱ្យប្រសើរឡើងមន្ទីរពេទ្យបង្អែកខេត្តបាត់ដំបង” ទី៣- ឥណទានសម្បទាន ដែលមានទឹកប្រាក់សរុបចំនួន១១.១៣៦ លានយ៉េន (ប្រមាណ ៩៨ លានដុល្លារអាមេរិក) សម្រាប់អនុវត្តគំរោង “ការធ្វើឱ្យប្រសើរឡើងនូវកំណាត់ផ្លូវជាតិលេខ៥ ភាគខាងជើង (ក្រុងបាត់ដំបង-ក្រុងសិរីសោភ័ណ) ជំហានទី២” និងទី៤- ហិរញ្ញប្បទានឥតសំណង ដែលមានទឹកប្រាក់សរុបចំនួន ៣.២៧១ លានយ៉េន (ប្រមាណ ២៨,៥ លានដុល្លារអាមេរិក) សម្រាប់អនុវត្តគំរោង “ពង្រីកប្រព័ន្ធផ្គត់ផ្គង់ទឹកស្អាតក្នុងខេត្តកំពង់ធំ”។
ប្រទេសជប៉ុន គឺជាដៃគូដ៏សំខាន់មួយរបស់កម្ពុជា ហើយបានរួមចំណែកយ៉ាងសំខាន់ដល់កម្ពុជាក្នុងការអភិវឌ្ឍសេដ្ឋកិច្ច សង្គម និងហេដ្ឋារចនាសម្ព័ន្ធ។ គំរោងទាំងនេះត្រូវបានរំពឹងទុកថា នឹងជួយកែ លំអរដល់ការតភ្ជាប់តំបន់របស់កម្ពុជា ហើយធ្វើឲ្យប្រសើរឡើងដល់ជីវភាព និងការថែរក្សាសុខភាពរបស់ប្រជាជន ការផ្គត់ផ្គង់ទឹកស្អាត និងការការពារទឹកជំនន់៕


អត្ថបទស្រដៀងនេះដែរ


ព័ត៌មានជាតិទូទៅ